KSC- جێگری سه‌رۆكی یه‌كێتی تۆپی پێی عێراق رایگه‌یاند خولی یانه‌ بژارده‌كانی عێراق له‌ هه‌ردوو شاری هه‌ولێر و دهۆك به‌رِێوه‌ده‌چێت و یه‌كێتییه‌كه‌ی له‌و بڕیاره‌ په‌شیمان نییه‌، ئه‌و یانه‌یه‌شی ده‌یه‌وێت خۆی بكێشێته‌وه‌، ئه‌وا كاره‌كه‌ په‌یوه‌ندیی به‌ خۆی هه‌یه‌. ناجیح حه‌ممود جێگری سه‌رۆكی یه‌كێتی تۆپی پێی عێراق له‌ لێدوانه‌كانییدا بۆ ئاژانسه‌كانی هه‌واڵ رایگه‌یاند یه‌كێتی تۆپی پێی عێراق له‌ بریاری خۆی په‌شیمان نابێته‌وه‌، كه‌ برِیاری داوه‌ یارییه‌كانی خولی تۆپی پێی یانه‌ بژارده‌كانی عێراق له‌ هه‌ردوو شاری هه‌ولێر و دهۆك به‌ڕێوه‌بچێت، ناوبراو دووپاتی ئه‌وه‌شی كرده‌وه‌ یارییه‌كان له‌ كاتی دیارییكراوی خۆیان دا به‌ڕێوه‌ده‌چن. هه‌روه‌ها له‌ باره‌ی هه‌ڕه‌شه‌ی چه‌ند یانه‌یه‌ك، كه‌ ده‌یانه‌وێت خۆیان له‌ خوله‌كه‌ بكێشنه‌وه‌ و نارِه‌زاییان له‌وه‌ ده‌ربڕیوه‌ یارییه‌كان له‌ كوردستان ئه‌نجام بدرێت، ناجیح حه‌ممود گوتی: ئه‌وه‌ی ده‌یه‌وێت خۆی بكێشته‌وه‌، ئه‌وه‌ په‌یوه‌ندیی به‌خۆی هه‌یه‌، ئه‌م بابه‌ته‌ جێگه‌ی گفتوگۆ نییه‌، خوله‌كه‌ ده‌گاته‌ وێستگه‌ی كۆتایی، ته‌نانه‌ت ئه‌گه‌ر یانه‌ گه‌وره‌ و جه‌ماوه‌رییه‌كانیش خۆیان بكێشنه‌وه‌، كه‌ ناڕازین له‌وه‌ی یارییه‌كان له‌ ده‌ره‌وه‌ی به‌غدا به‌ڕێوه‌بچێت. جێگه‌ی باسه‌ یانه‌كانی شوڕته‌ و ته‌ڵه‌به‌ و زه‌وڕا و جه‌وییه‌ برِیاری ئه‌وه‌یان داوه‌ كه‌ به‌شداریی خوله‌كه‌ نه‌كه‌ن، به‌هۆی ئه‌وه‌ی یانه‌كانی هه‌ولێر و دهۆك میوانداریی یارییه‌كانی خولی بژارده‌ ده‌كه‌ن. ناجیح حه‌ممود هه‌روه‌ها گوتی: ئه‌و دۆسیانه‌ی میوانداریی، كه‌ یانه‌كانی هه‌ولێر و دهۆك پێشكه‌شیان كردبوو، هه‌موو مه‌رجه‌كانی هونه‌ریی و ئاساییشی و دارایی، كه‌ یه‌كێتی تۆپی پێ دایناوه‌، له‌خۆگرتبوو، ئه‌مه‌ جگه‌ له‌وه‌ی هه‌ردوو یانه‌ش یاریگه‌ی تازه‌یان بۆ به‌رِێوه‌بردنی یارییه‌كان و ئه‌نجامدانی مه‌شق هه‌یه‌، هه‌روه‌ها هوتێلی باش و رێكوپێك و پله‌ به‌رز له‌ هه‌ردوو شاردا بۆ میواندارییكردنی یانه‌كان هه‌یه‌. له‌لایه‌كی دیكه‌ عه‌بدولخالق مه‌سعود ئه‌ندامی یه‌كێتی تۆپی پێی عێراق و ئه‌مینداریی دارایی له‌ لێدوانێكییدا به‌- زاگرۆس تیڤی- رایگه‌یاند كه‌ یانه‌كانی مینا و نه‌جه‌ف و كه‌ربه‌لا و سناعه‌ و نه‌فت پاره‌ی خۆیان وه‌رگرتووه‌، كه‌ له‌ میواندارییكاری گروپه‌كان وه‌ریده‌گرن و بڕیاریش وایه‌ ئه‌مڕۆ چه‌ند یانه‌یه‌كی دیكه‌ش پاره‌كه‌یان وه‌ربگرن، كه‌ هه‌ر یانه‌یه‌ك بڕی 17 ملیۆن دینار له‌ بری هاتووچۆ و خواردن و مانه‌وه‌ وه‌رده‌گرن.