KSC- د. عه‌بدوڵڵا مه‌جید رایگه‌یاند یانه‌كه‌ی تا ئێستا نه‌یتوانیووه‌ یاریزانی تازه‌ بهێنێته‌ ریزه‌كانی یانه‌كه‌ی و گوتی چاوه‌ڕێی ئه‌وه‌ ده‌كه‌ین كامه‌ یاریزان له‌ هه‌ڵبژارده‌ی عێراق دوورده‌خرێته‌وه‌ بیهێننه‌ ریزه‌كانی یانه‌كه‌مان
د. عه‌بدوڵڵا مه‌جید سه‌رۆكی یانه‌ی هه‌ولێر باسی ئه‌وه‌ی كرد كه‌ تا ئێستا نه‌یانتوانیووه‌ یاریزانی دیكه‌ بهێننه‌ ریزه‌كانی یانه‌كه‌یان، ئه‌و له‌مباریه‌وه‌ گوتی: چاوه‌رِێ ده‌كه‌ین بزانین كامه‌ یاریزان له‌ پێكهاته‌ی هه‌ڵبژارده‌ی عێراق دوورده‌خرێته‌وه‌، بۆندی له‌گه‌ڵ بكه‌ین، چونكه‌ یاریزانی هه‌ڵبژارده‌ی عێراق بۆ ئێمه‌ سوودی نابێت و كه‌ڵكی نییه‌، به‌هۆی ئه‌وه‌ی هه‌ڵبژارده‌ی عێراق له‌ 16-6-2007 به‌شداریی له‌ خولی رۆژئاوای ئاسیا ده‌كات.
سه‌رۆكی یانه‌ی هه‌ولێر ئاماژه‌ی به‌وه‌دا كه‌ خولی یانه‌ بژارده‌كانی عێراق له‌ تۆپی پێ له‌ 15 ی ئه‌م مانگه‌وه‌ ده‌ستپێده‌كات و سه‌باره‌ت به‌ شاری هه‌ولێریش، رۆژانه‌ سێ یاری به‌ڕێوه‌ده‌چن، دوو یاری له‌ یاریگه‌ی شه‌هید فڕه‌نسۆ و یارییه‌كییش له‌ یاریگه‌ی پیرمام .
د. عه‌بدوڵڵا له‌ باره‌ی كاتی یارییه‌كان گوتی: یارییه‌كان له‌ كاته‌كاتی 5:30 ی ئێواره‌ و 7:30 ی ئێواره‌ به‌ڕێوه‌ده‌چن.
سه‌رۆكی یانه‌ی هه‌ولێر خشته‌ی یارییه‌كانی یانه‌ی هه‌ولێریشی ئاشكرا كرد و گوتی: یاری یه‌كه‌ممان به‌رامبه‌ر كه‌ربه‌لا ده‌بێت كه‌ یاری كردنه‌وه‌ی گروپه‌كه‌یه‌، دووه‌م یارییمان به‌رامبه‌ر مینایه‌ و یاری سێیه‌میش به‌رامبه‌ر یانه‌ی نه‌فتی به‌غدایه‌، هه‌روه‌ها یاری چواره‌مییش به‌رامبه‌ر یانه‌ی ته‌ڵه‌به‌ ئه‌نجام ده‌ده‌ین، دوا یارییشمان به‌رامبه‌ر یانه‌ی شوڕته‌ ده‌بێت.